Zbardhjet vrasja e trefishtë në Elbasan në 2018-n, shpallet në kërkim 35-vjeçari (Emri)

 Pas më shumë se 2 vitesh nga masakra e trefishtë në Bradashesh të Elbasanit, policia ka identifikuar një prej autorëve të dyshuar të ngjarjes. Ai është 35-vjeçari Mikael Qosja, i shpallur tashmë në kërkim ndërkombëtar për akuzat e vrasjes në rrethana të tjera cilësuese, e kryer në bashkëpunim dhe armëmbajtje pa leje.
Qosja akuzohet se më 29 Dhjetor të 2018-s, vrau me armë zjarri Endrit Alibej 34 vjeç, Arben Dylgjeri 56 vjeç (nip dhe dajë), si dhe turkun Erdal Durunay 51 vjeç.
​Në atentatin në fjalë dyshohet se morën pjesë të paktën 3 persona. Viktimat kishin vetëm pak ditë që ishin kthyer në Shqipëri për festat e fundvitit, kur u qëlluan me breshëri automatiku teksa udhëtonin me makinë. Objektiv i këtij atentati dyshohet se ishte 34-vjeçari Alibej.Shkak për ngjarjen dyshohet se ishin përplasjet e grupeve kriminale në trafikun e drogave të rënda në Holandë dhe Angli. Në këto vende grupet rivale, të cilat origjinën e kanë në Elbasan, kanë patur konflikte të shpeshta dhe përplasje mes tyre.