Asnjë ndërhyrje për pastrimin e rrugëve/ Edhe policia: Mos dilni nga shtëpia

Pas ministrisë së Mbrojtjes që këshillonte qytetarët që të mos dilnin nga shtëpia edhe Policia e Shteteit u jep qytetarëve shqiptare të njëjtën këshillë që të mos dalin nga shtëpia.
Situata është katastrofike në shumë akse të vendit për shkak të borës.
​

Por sidomos kjo situatë është përkeqësuar pasi nuk ka asnjë angazhim nga strukturat përgjegjëse për mirëmbajtjen e rrugëve për ti pastruar ato nga bora dhe akulli që është prezent
Ja njoftimi i policisë:
Policia e Shtetit
Nisur nga situata e krijuar për shkak të motit të keq, me prezencë të akullit, borës dhe ujit në të gjitha akset rrugore nacionale dhe rurale në të gjithë vendin, Policia e Shtetit u bën thirrje të gjithë përdoruesve të rrugës:
Të kufizojnë lëvizjet e panevojshme dhe të ndjekin këshillat dhe udhëzimet e Policisë rrugore dhe të autoriteteve të tjera.
Të vendosin gomat e dimrit në automjetet e tyre.
Të vendosin zinxhirët para se të fillojnë lëvizjen me automjet, pasi punonjësit e Policisë nuk do të lejojnë qarkullim e automjeteve pa zinxhir.
Të vendosin rripin e sigurimit.
Të mos kryejnë parakalime të gabuara.
Të kufizojnë në maksimum shpejtësinë, pasi në të gjitha akset rrugore ka prezencë të akullit dhe të borës, gjë që rrit rrezikun e përfshirjes në aksidente rrugore.
Policia e Shtetit ka kaluar në gatishmëri të përforcuar, duke rritur prezencën e shërbimeve policore në akset rrugore nacionale, në qytete dhe në qendrat e njësive administrative, me qëllim për t’iu ardhur në ndihmë qyetarëve në nevojë.
Strukturat e Policisë së Shtetit janë duke operuar në terren, në koordinim e bashkëpunim me autoritetet e tjera përgjegjëse, për normalizimin e situatës së krijuar si pasojë e motit të keq.
Për çdo problem apo informacion mund të telefononi në numrin pa pagesë 112 ose shkruani në Komisariatin Dixhital, duke iu siguruar reagim të menjëhershëm.